६ भदौ, काठमाडौं । नेकपा एमालेले आगामी संविधानसभाको चुनावका लागि प्रत्येक चुनाव क्षेत्रबाट एक महिलासहित ३/३ जना उमेद्वारको नाम सिफारिस गर्न जिल्ला कमिटीलाई निर्देशन गरेको छ । साथै अघिल्लो संविधानसभामा समानुपातिकतर्फबाट सभासद भएकालाई विशेष अवस्थामा बाहेक फेरि समानुपातिकको सूचीमा नराख्ने निर्णय गरेको छ ।

पार्टी मुख्यालय बल्खुमा विहीबार बसेको स्थायी कमिटीको बैठकले भदौ २० गतेभित्र उमेद्वारको नाम पठाउन निर्वाचन क्षेत्र र जिल्ला कमिटीलाई परिपत्र गर्ने निर्णय गरेको हो । ‘स्थायी कमिटीको बैठकले उमेद्वारहरुको नाम पठाउन जिल्ला कमिटीलाई सर्कुलर गर्ने निर्णय गरेको छ’-स्थायी कमिटी सदस्य भरतमोहन अधिकारीले अनलाइनखबरलाई बताउनुभयो ।

प्रत्यक्षतर्फ उम्मेदवार सिफारिस गर्दा प्रतेक निर्वाचन क्षेत्रबाट एक जना महिला हुनु पर्ने भने पार्टीको कारवाहीमा परेको भए ६ महिना पूरा भएको हुनु पर्ने लगायतको मापदण्ड तोकेको छ । एमालेले समानुपातिकतर्फका लागि हरेक निर्वाचन क्षेत्रबाट २ जनाको नाम पठाउन भनेको छ । तर, विशेष अवस्थामा बाहेक पहिलेका समानुपातिक सभासदले फेरि समानुपातिक उमेद्वार बन्न नपाउने भएका छन् ।

विशेषज्ञ, दलित, महिला, जनजाति र तराई मधेसको प्रतिनिधित्वका लागि भने अघिल्लो संविधानसभामा समानुपातिबाट सभासद भएकालाई पनि उम्मेदवार बनाउन सकिने सचिव शंकर पोखरेलले जानकारी दिनुभयो ।

स्थायी कमिटीको बैठकले चुनावी रणनीति बनाउन भदौ १५ गते केन्द्रीय कमिटीको बैठक बोलाउने निर्णय गरेको छ । स्थायी कमिटीले चुनावी घोषणापत्र बनाई केन्द्रीय समितिमा पेश गर्नेछ भने जिल्लाहरुबाट आएको उम्मेदवारहरुको सूची पनि केन्द्रीय समितिमा पेश गरिने एमालेले जनाएको छ ।

बैठकले पूर्वअर्थमन्त्री भरतमोहन अधिकारीको संयोजकत्वमा आर्थिक परिचालन कमिटी गठन गरेको छ । पार्टीभित्र देखा परेको विवाद समाधानका लागि दुबैपक्षका कुरा सुनेर नेतृत्वले हल गर्ने स्थायी कमिटीमा सहमति भएको एमाले नेताहरुले बताएका छन् ।