परासी, २६ जेठ । जिल्ला प्रशासन कार्यालयकै कर्मचारीको मिलेमतोमा नवलपरासीमा एक व्यक्तिले १२ जनालाई आफ्नो छोरा बनाई नागरिकता दिलाएको भेटिएको छ । परासी सनईका सरफु्द्दिन मुसलमानले गाविसबाट सिफारिस बनाई भारतीय नागरिकसहित १२ जनाको नागरिकता बनाइदिएको खुलासा भएको छहो । मुसलमानले नक्कली नागरिकता दिलाएको उजुरीपछि जिल्ला प्रशासन कार्यालयले गठन गरेको छानबिन समितिले पेस गरेको प्रतिवेदनमा फर्जी नागरिकता वितरण गरेको खुलासा भएको हो । 

मुसलमानले गाविस सचिवले सिफारिस गर्दा दिने सबै कागजात आफैँ तयार गरी सचिव गोकुल गिरीको समेत किर्ते हस्ताक्षर गरेका थिए । गाविसका सचिव गिरीले नक्कली कागजपत्र पेस गरी नागरिकता निकालेको उजुरी हालेपछि प्रशासनले छानबिन समिति गठन गरेको थियो । मुसलमानले बाबु बनेर नागरिकता दिलाउनेको सङ्ख्या १७ जना रहेको बताइएको छ ।