१७ चै, काठमाडौं । नेकपा एमालेका अध्यक्ष झलनाथ खनालले आगामी असार पहिलो साताभित्रै संविधानसभा निर्वाचन हुने बताउनुभएको छ । प्रेस चौतारी कञ्चनपुरले शनिबार गरेको पत्रकार भेटघाटमा खनालले निर्वाचन आयोगले असारमै निर्वाचन सम्पन्न गर्नका लागि कानुनी र प्राविधिक तयारी गरिरहेको बताउनुभयो ।

   तर कारणवश चुनाव असारमा नभए राजनैतिक दलको सहमतिमा आगामी मङ्सिरसम्ममा संविधानसभाको निर्वाचन हुने खनाल वताउनुभयो । सरकारले पर्याप्त गृहकार्य गरेर मात्रै निर्वाचनको मिति घोषणा गर्नुपर्नेमा उहाँले जोड दिनुभयो । उहाँले लोकतन्त्रमा विश्वास गर्ने शक्तिबीच कार्यगत एकता गरी चुनाव लड्नुपर्ने पनि बताउनुभयो ।