५ भदौ, काठमाडौं । आईसीसी यू-१९ विश्वकप क्रिकेटमा नेपालले पहिलो जित हात पारेको छ ।

लगातार चार खेल हारेपछि प्लेट च्याम्पियनको दौडबाट समेत बाहिरिसकेको नेपालले १३ औँ स्थानका लागि भएको प्ले अपको सेमिफाइनलमा नामिवियालाई ३९ रनले पराजित गरेको हो । अब नेपालले १३ औं स्थानका लागि फाइनलमा पर्सी पपुवा न्यू गिनीको सामना गर्नेछ ।

टस जितेर पहिले व्याटिङ गरेको नेपालले निर्धारित ५० ओभरमा ७ विकेटको क्षतिमा २ सय १९ रन जोडेको थियो । खराब सुरुवात गरेको नेपाली पारी मध्यक्रमका ब्याट्सम्यानहरुले सम्हालेका थिए । नेपालका लागि प्रदिप ऐरी आक्रमक पारी खल्दै ७६ बलमा ३ छक्का र ३ चौकको मदतमा ९८ रन बनाए । जारी प्रतियोगितामा नेपाली व्याट्सम्यानको सर्बाधिक रन बनाएका हुन् । उनले राजेश पुलामि मगरसँग ६४ रन तथा हसिम अन्सारीसँग ६० साझेदारी गरेका थिए ।

सुवास खकुरेलले ३५, राजेश पुलामी मगरले २४ तथा पृथु बास्कोटाले १८ रन बनाए । सागर पुन ७, फैजल रहमान ५, कृष्ण कार्की ३ र नरेश बुढाएरले १ रन जोडे । नामिवियाका क्रिस्टोफर कोम्बीले ३ विकेट लिए ।

२ सय २० रन लिएर जवाफमा मैदान उत्रिएको नामिविया ४६ दशमलब ३ ओभरमा सवै विकेट गुमाउँदै १ सय ८० रनमा समेटियो । नेपाललाई जित दिलाउन भूवन कार्कीले सर्वाधिक ५ विकेट लिए । कप्तान पृथु बाँस्कोटा, सागर पुन, प्रदीप ऐरी, रामनरेश गिरी र कृष्ण कार्कीले समान एक-एक विकेट झारे ।