९ कार्तिक, सप्तरी । नेपाली काँग्रेस सप्तरीका उप–सभापती नीरु पोखरेलले आज पार्टीबाट राजिनामा दिनुभएको छ । संविधान सभा चुनावका लागि सप्तरीको एक नम्बर क्षेत्रबाट क्षेत्रिय समितिले सिफारिस गरेका तीन जना प्रत्यक्ष र पाँच समानुपातिकमध्ये कसैको पनि नाम नपरेको भन्दै उप–सभापती पोखरलेलले आज पत्रकार सम्मेलनको आयोजना गरेर जिल्ला सभापती दिनेश यादवसमक्ष राजिनामा पत्र बुझाएको हो ।

उहाँले पार्टीको साधारण सदस्य समेत नरहने गरेर राजीनामा दिनुभएको हो । राजिनामा दिएपनि तत्कालै कुने पार्टीमा नजाने र सम्भवत समाजसेवामा जुट्ने पत्रकार सम्मेलनमा जानकारी दिनुभयो । समानुपातिकमा उपसभापति पोखरेलको नाम नपरेपछि उहाँले राजीनामा दिनुभएको काँग्रेस स्रोतले बताएको छ । यसअघि काँग्रेस सप्तरीका सचिव सबुरलाल साह र कोषाध्यक्ष शम्भु झाले पनि पार्टीबाट राजीनामा दिइसक्नुभएको छ । झा हाल फोरम नेपालमा प्रचार विभाग प्रमुखको पदमा हुनुहुन्छ भने सचिव साहले संविधान सभा चुनावमा सप्तरी ५ बाट बागी उम्मेदवारी दिनुभएको छ ।