काठमाडौँ, २ असोज । इन्द्रजात्राका अवसरमा आज गणेश, भैरव र कुमारीको रथयात्रामा राष्ट्रपती डा. रामवरण यादव सरिक हुनुभएको छ । यादव आज साँझ काठमाडौंको बसन्तपुरमा जानुभई सो यात्रामा सरिक हुनुभएको हो । रथयात्रामा उपराष्ट्रपती परमानन्द झा, मन्त्रिपरिषद्का अध्यक्ष खिलराज रेग्मी, संवैधानिक अङ्गका प्रमुखहरू, मन्त्रीगण तथा विभिन्न मुलुकका कुटनीतिज्ञ र ठूलो सङ्ख्यामा सर्वसाधारणको समेत सहभागिता रहेको थियो । 

बसन्तपुरबाट सुरु सो रथयात्रा जैसीदेवल, लगन, ब्रम्हटोल, कोहिटी, भीमसेनस्थान हुँदै पुनः बसन्तपुर ल्याइने कार्यक्रम रहेको स्थानीय समाजसेवी गणेश शाक्यले जानकारी दिनुभुयो । प्रत्येक वर्ष भाद्र शुक्ल चतुर्दशी तथा नेपाल संवतको ञलाथ्व चर्तुदशीका दिन मनाइने इन्द्रजात्रा तत्कालीन राजा जयप्रकाश मल्लको पालादेखि प्रचलन सुरु भएको विश्वास गरिन्छ । 

भाद्र शुक्ल द्वादशीका दिन हनुमानढोकामा इन्द्रध्वजा फराइएपछि जात्रा सुरु भएको मानिन्छ । जात्रा एक सातासम्म जारी रहन्छ भने रथयात्राका दिन राष्ट्र प्रमुखको उपस्थिति हुने र अन्तिम दिन राष्ट्र प्रमुखले जीवित देवीका रुपमा मानिने कुमारीको हातबाट टीका थाप्ने प्रचलन रहेको छ ।