काठमाडाँै, ७ असोज । राजधानी काठमाडौंमा संचालन हुने एएफसी (यु–१६) फुटबल प्रतियोगिताको तयारी पुरा भएको छ । अखिल नेपाल फुटबल सङ्घ (एन्फा) ले आज सोमबार राजधानीमा पत्रकार सम्मेलनको आयोजना गरेर एसियाली फुटबल महासङ्घको कार्यक्रमअनुसार प्रतियोगीताको तयारी पुरा भएको जनाएको हो । प्रतियोगिताअन्तर्गत समूह सी को छनोट खेल यही असोज ९ देखि १३ गतेसम्म सञ्चालन हुने र त्यसका लागि सम्पूर्ण तयारी पूरा भएको संघको भनाई छ ।

प्रतियोगितामा नेपालसहित इराक, तुर्किमेनिस्तान र बहराइनका सोह्र बर्ष मुनिकाको राष्ट्रिय टिमको सहभागिता रहनेछ । दशरथ रङ्गशालामा हुने सो प्रतियोगितामा  प्रतियोगितामा सहभागिता जनाउन इराक र बहराइनका टिम नेपाल आइसकेका छन् । तुर्किमेनिस्तानको टिम आज बेलुकासम्ममा आइपुग्ने बताइएको छ । खेल हेर्न आउने दर्शकले छाता, सिक्का, पानीको बोटल, लाइटरजस्ता वस्तु भित्र लैजान निषेध गरिएको छ । यस्तै भिआइपी प्याराफिटतर्फ रु पाँच सय र साधारण प्याराफिटतर्फ रु दुई सय टिकट दर निर्धारण गरिएको एन्फाले जनाएको छ । प्रतियोगिता सञ्चालनका लागि करिब रु ४७ लाख खर्च लाग्ने अनुमान गरिएको छ