१८ श्रावण, काठमाडौं । नेपाल सुनचाँदी व्यवसायी महासङ्घले साताको अन्तिम दिन छापावाल सुनको मूल्य आज प्रतितोला रु ५२ हजार ५० निर्धारण गरी कारोबार भएको जनाएको छ ।

 नेपाली बजारमा सुनको मूल्य अघिल्लो दिनको तुलनामा आज  एक हजार रुपैयाँले घटेको हो । अन्तर्राष्ट्रिय बजारमा हिजो सुन प्रतिऔँस एक हजार ३१८ अमेरिकी डलर रहेकामा आज प्रतिऔँस ३० अमेरिकी डलरले कमी भई एक हजार २८८ अमेरिकी डलर कायम भएको र त्यसैको प्रभावले नेपाली बजारमा सोको मूल्य घटेको महासङ्घका महासचिव माणिकरत्न शाक्यले जानकारी दिनुभयो ।
महासङ्घले तेजाबी सुनको मूल्य आज प्रतितोला रु ५१ हजार ८०० निर्धारण गरेको छ । सोको मूल्य हिजो प्रतितोला रु ५२ हजार ८०० मा कारोबार भएको थियो । त्यसैगरी असली चाँदीको मूल्यमा पनि अघिल्लो दिनको तुलनामा प्रतितोला रु १० ले कमी भई आज प्रतितोला रु ८२० कायम भएको छ । यो साता बजारमा सुनको मूल्यमा पटकपटक घटबढ भई बुधबार प्रतितोला ५३ हजार ९०० रुपैयाँ मूल्य कायम भएको थियो ।