१८ श्रावण, भक्तपुर । भक्तपुर प्रहरीले शुक्रबार अवैध रुपमा ओसारपसार भइरहेको कुखुराको अण्डा र चल्ला बरामद गरेको छ । पन्क्षी र पन्क्षी जन्य वस्तुको ओसारपसारमा लगाएको प्रतिबन्ध विरुद्ध कुखुराको चल्ला र अण्डा ओसारपसार गरेको पाईएकोले प्रहरीले आज बरामद गरेको हो । बरामद गरिएको चल्ला आज नै नष्ट गरिने र अण्डा परीक्षणका लागि प्रयोगशाला पठाएको जिल्ला पशु सेवा कार्यालय भक्तपुरका प्रमुख खगेन्द्रराज भट्टले जानकारी दिनुभयो ।
भक्तपुरको शिखर पोल्टिफार्म चित्तपोलले बा ८ च ९९७० नम्बरको भ्यानमा काठमाडौं ल्याउँदै गरेको १८ हजार ४ सय ८० वटा अण्डा र बारा कलैयाका जताशंकर शाहले काभ्रेको पाँचखाल लैजादै गरेको २ सय चल्ला भक्तपुरको जगातीमा बरामद गरेको प्रहरीले जनाएको छ । बर्डफ्लूको भाइरस फैलिएपछि सरकारले नियन्त्रणका लागि भन्दै हिजोदेखि काठमाडौं उपत्यकामा ७ दिनसम्म पन्क्षी र पन्क्षीजन्य बस्तु ओसारपसारमा रोक लगायको छ ।