नेकपा एमालेका अध्यक्ष झलनाथ खनालले आगामी फागुनमा पार्टीको नवौ महाधिवेशन गर्न पार्टीमा प्रस्ताव गर्नुभएको छ । प्रभावशाली नेता केपी ओलीले संविधानसभा निर्वाचन अगावै पार्टी महाधिवेशन गर्न प्रस्ताव गरेको समयमा खनालले फागुनमै नियमित महाधिवेशन गर्न प्रस्ताव गर्नुभएको हो ।

पार्टी केन्द्रीय कार्यालय बल्खुमा आजदेखी सुरु केन्द्रीय समिति बैठकमा अध्यक्ष खनालले नवाँै महाधिवेशन फागुनमा गर्न प्रस्ताव गर्नुभएको हो । फागुनमा महाधिवेशन गर्नेगरी तत्काल सम्पूर्ण ध्यान मंसीरको संविधानसभा निर्वाचनमा केन्द्रीत गर्नुपर्ने प्रस्ताव आएको प्रचार विभाग प्रमुख प्रदीप ज्ञवालीले जानकारी दिनुभयो । बुटबलमा आठौ महाधिवेशन सम्पन्न भएको फागुनमा पाँच बर्ष पुग्दैछ । 

अध्यक्ष खनालले संविधानसभाको निर्वाचन मंसीरमै गर्नुपर्ने भन्दै सम्पूर्ण ध्यान त्यसैतर्फ केन्द्रीत गर्नुपर्ने बताउनु भएको छ । केन्द्रीय समितिको जारी बैठकले केन्द्रीय समितिमा मनोनयनगर्न बाकी केन्द्रीय सदस्य नियुक्त गर्ने संभावना रहेको स्रोतले बतायो । केन्द्रीय समितिको आर्को बैठक भोलि विहान ११ बजे पुनः बस्नेछ । नेतृत्वसंग असन्तुष्ट प्रभावशाली नेता ओली भने आजको बैठकमा उपस्थित हुनुभएन ।