२१ जेठ, काठमाडौं । अपहरण गरी फिरौती असुलेको आरोपमा तीनजना भारतीय नागरिक नेपाल–भारतको सीमा नाका भिठ्ठामोडबाट पक्राउ परेका छन् । उनीहरुले गत जेठ १० गते महात्तरीको सुनौल ९ बाट पोखरभिण्डा २ का ३८ वर्षिया उमेशप्रसाद यादवलाई अपरहण गरी पाँच लाख रुपैयाँ फिरौती लिएर तिन दिनपछि गत जेठ १३ गते छोडेका थिए । फिरौती लिएको अभियोगमा भारतको सीतामढी बेलाथाना खैरबाका जबाहर मंसुरी, मोइम मंसुरी र सबिर मंसुरीलाई प्रहरीले पक्राउ गरेका हुन् । उनीहरुको साथबाट ४ प ३२५६ नम्बरको मोटरसाइकल समेत बरामद गरेको छ । अपहरणमा संलग्न अन्य नौ जनाको खोजीकार्य भैरहेको जिल्ला प्रहरी कार्यालय महात्तरीका प्रहरी नायव निरीक्षक विगन यादवले जानकारी दिनुभयो ।

यसैबिच बागलुङकोे सुखौराकी एक किशोरीलाई सामुहिक बलात्कार गर्ने तीनजनालाई प्रहरीले पक्राउ गरेको छ । स्थानीय १४ वर्षीया किशोरीलाई बलात्कार गर्ने सुखौरा– ३ का १९ वर्षीय सुमन गिरी, २० वर्षीय अनिल गिरीसहित १४ वर्षीय एक किशोरलाई पनि प्रहरीले पक्राउ गरेको हो । किशोरीलाई जेठ १४ गते मङ्गलबार दिउँसो १ बजे उनीहरुले बलात्कार गरेको प्रहरी सहायक निरीक्षक शैलेन्द्र खड्काले बताउनुभयो । पक्राउ परेकालाई भोलि म्याद थप गरी आवश्यक अनुसन्धान पछि मुद्दा चलाउने प्रहरीले जनाएको छ ।