१७ चैत्र, काठमाडौं । एकिकृत नेकपा माओबादीले केन्द्रिय समितिको संख्या २ सय ५० बनाउने निर्णय गरेको छ । पार्टी मुख्यालय पेरिसडाँडामा आज बसेको बैठकले केन्द्रिय समितिको आकार घटाउने निर्णय गरेको हो । गत सोमबार बसेको केन्द्रीय समितिको वैठकले १ सय ५१ सदस्यीय केन्द्रीय समितिलाई ३ सय ९९ सदस्यीय वनाउने अध्यक्ष प्रचण्डको प्रस्ताव पारित गरेपछि पार्टी भित्र तिब्र बिरोध भएको थियो । सो विवाद मिलाउन गत विहिबार बसेको पार्टीको पदाधिकारी बैठकले विभिन्न राज्य समिति र ब्यूरोसँग छलफल गरि केन्द्रिय समितिको आकार घटाउने पहल गरेको थियो । बैठकपछि पार्टी प्रवक्ता अग्निप्रसाद सापकोटाले केन्द्रीय समिति विस्तारमा कार्यक्षमता, बरिष्ठता, महिला, मधेसी, दलित र पिछडिएको वर्गलाई समेटिने जानकारी दिनुभयो । आजको वैठकले संविधानसभा निर्वाचन लक्षित गर्दै एक महिने भेला तथा प्रशिक्षण कार्यक्रम सञ्चालन गर्ने निर्णय पनि गरेको छ । 

यसैबीच मोहन वैद्य नेतृत्वको नेकपा–माओवादीबाट एकीकृत नेकपा माओवादीमा प्रवेश गरेका तीनै नेतालाई एमाओवादी अध्यक्ष पुष्पकमल दाहालले आज औपचारिक रुपमै पार्टी प्रवेश गराउनुभएको छ । पार्टी प्रवेश गरेका कृष्णध्वज खड्का, कुमार दाहाल र रेखा शर्मा आजको केन्द्रीय समितिको बैठकमा सहभागी भए ।