अजय देवगन अभिनित चलचित्र ‘हिम्मतवाला’ शुक्रबारदेखि विश्वभर प्रदर्शनमा आएको छ । तर चलचित्रले सुरुवातमा पनि उत्साहजनक कलेक्शन गर्न सकेन । भारतका ३ हजार पर्दामा एकसाथ चलेको यो सिनेमाले बक्स अफिस इन्डियामा सोचेजस्तो व्यापार गर्न सकेको छैन ।चलचित्रले शुक्रबार १२ करोडको व्यापार गरेको छ । ३ हजार पर्दामा लागेको सिनेमाको व्यापार कमजोर भएको चलचित्र विश्लेषक तथा हलसंचालकहरुको भनाई छ । निर्देशक साजिद खानले ‘हिम्मतवाला’ यो बर्षकै सबैभन्दा धेरै व्यापार गर्ने चलचित्रको रुपमा दरिने घोषणा गरेका थिए । तर चलचित्रको कलेक्शन र समिक्षाले साजिद खानको अड्कल वास्तविकतामा बदलिने कुरामा शंका व्यक्त गर्न सकिन्छ ।

चलचित्रलाई भारतिय संचारमाध्यमहरुले १ देखि १.५ स्टार दिएका छन् । यसैले पनि यो चलचित्रले बक्स अफिसमा धमकेदार कलेक्शन गर्ने सम्भावना टर्दै गएको छ । अर्को साता प्रतिक्षारत चलचित्र ‘चश्मे बदुर’ प्रदर्शनमा आउँदैछ । ‘हिम्मतवाला’ ले ३ दिनको कलेक्शनमा ५० करोड कटाएको खण्डमा १ सय करोड क्लबमा पुग्न केही सजिलो हुने विश्लेषण गरिएको छ । तर यति रकम कमाउन यो सिनेमालाई फलामका चिउरा चपाएजस्तै हुने देखिन्छ ।