२६ साउन, काठमाडौं । एकीकृत नेकपा माओवादीका अध्यक्ष पुष्पकमल दाहाल प्रचण्डले संघीयता पक्षधरको मोर्चाले दलहरुबीच सहमतिका लागि मदत पुग्ने बताउनु भएको छ ।

शुक्रबार राजधानीमा आयोजित कार्यक्रमपछि सञ्चारकर्मीहरुसँग कुरा गर्दै प्रचण्डले मोर्चाले कांग्रेस-एमाले लगायतका दलहरुसँग राजनीतिक सहमति बनाउन सहज हुने दावी गर्नुभयो । उहाँले भन्नुभयो-’त्यो राजनीतिक सहमति बनाउने उदेश्यले नै समान विचार भएका पार्टीहरु, संघ संस्थाहरु एउटा मोर्चामा आवद्ध भयो भने राजनीतिक सहमति बनाउन सजिलो हुन्छ । यो मोर्चा बन्यो भने कांग्रेस, एमाले जस्ता पार्टीहरुसँग सहमति बनाउन अझ सहज हुन्छ ।’

प्रचण्डले राजनीति सहमति विना अहिलेको राजनीतिक गतिरोध, संवैधानिक संकट समाधान सम्भव नभएको समेत बताउनु भयो । अग्रगामी राज्य पुनःसंरचना र सबै प्रकारको भेदभाव अन्त्य गर्नु मोर्चाको लक्ष्य रहेको उहाँले बताउनु भयो ।

सत्तारूढ एकीकृत नेकपा माओवादी र संयुक्त लोकतान्त्रिक मधेसी मोर्चाको पहलमा संघीयता पक्षधरहरुको मोर्चा ‘संघीय लोकतान्त्रिक गठबन्धन एनडएफ’ बनाउने तयारी भइरहेको छ ।