नेपाल सरकारद्धारा तोकिएको शिक्षक पोशाकलाई मुल्यसँग तुलना गर्न नहुने धादिङका जिल्ला शिक्षा अधिकारी दिपेन्द्र सुवेदीले बताउनुभएको छ । बागेश्वरी उच्च माध्यामिक विद्यालय बैरेनी स्रोतकेन्द्रको प्रधानाध्यापकहरुको मासिक बैठकमा सम्बोधन गर्नुहुँदै सुवेदीले पोशाकको लागि छुट्याएको रकमको दुरुपयोग नगर्न समेत आग्रह गर्नुभयो । कार्यक्रमका प्रमुख अतिथि समेत रहनुभएका सुवेदीले जिल्लाका सम्पुर्ण विद्यालयहरुलाई नमुना विद्यालय बनाउनुपर्नेमा जोड दिनुभएको थियो । उहाँले स्थायी शिक्षकहरुले सम्पती विवरण उल्लेख गर्न, विद्यालयले सामाजिक लेखापरिक्षण अनिवार्य संचालन गर्न र जिम्मेवारीलाई पुरा गर्न सम्पुर्ण शिक्षकहरुलाई निर्देशन दिनुभएको छ । बागेश्वरी उच्च माध्यामिक विद्यालय बैरेनीका प्रधानाध्यापक ध्रुवराज खतिवडाको अध्यक्षता तथा जिल्ला शिक्षा अधिकारी दिपेन्द्र सुवेदीको प्रमुख आतिथ्यमा सम्पन्न गोष्ठिमा बैरेनी स्रोतकेन्द्रमा पर्ने ३१ वटा विद्यालयका प्रधानाध्यपकहरुको उपस्थिति रहेको थियो । गोष्ठिको सहजिकरण स्रोत व्यक्ति रामजीप्रसाद गौतमले गर्नुभएको सहकर्मी किशोर अधिकारीले जानकारी दिनुभएको छ ।