१३ साउन, काठमाण्डौ । नेपाली काँग्रेसका महामन्त्री प्रकाशमान सिंहले प्रधानमन्त्री डा बाबुराम भट्टराईले तत्काल राजीनामा नदिए सडक आन्दोलनवाट सरकारलाई घुँडा टेकाउने चेतावनी दिनुभएको छ । उहाँले राजीनामा दिएर सहमतिको वातावरण नबनाए सशक्त सडक आन्दोलनवाट हटाउने चेतावनी दिनुभएको हो । नेपाली काँगे्रस क्षेत्र नं. ७ ले ३० सौँ बिपी स्मृति दिवसका अवसरमा राजधानीमा आयोजना गरेको कार्यक्रमलाई सम्बोधन गर्दै उहाँले दलहरुका बीचमा सहमतिको सरकार गठनका लागि प्रधानमन्त्रीले वाटो खोल्नु पर्ने वताउनुभयो । उहाँले प्रधानमन्त्रीले राजीनामा नदिएसम्म कुनै सहमति जुट्न नसक्ने दावी गर्नु भयो । सिंहले काँगे्रस कहिल्यै पनि सङ्घीयताको विरोधी नभएकाले मुलुकका आम जनजाति, मधेसी, दलित र महिलाको आत्मसम्मान हुनेगरी सङ्घीयताको अवधारणा बनाउन आवश्यक भएकोमा जोड दिनुभयो । कार्यक्रममा काँगे्रस नेता डा मीनेन्द्र रिजाललेे अध्यादेशमार्फत पूर्वविशिष्ट पदाधिकारीहरुलाई सेवासुविधा दिने वर्तमान सरकारको निर्णय गलत भएको वताउनुभयो । उहँले निश्चित मापदण्ड बनाई राजनीतिबाट बाहिरिएकालाई मात्र त्यस्तो सेवासुविधा दिँदा राम्रो हुने बताउनुभयो ।