निर्वस्त्र विवाह भनेको कस्तो विवाह होला ? बेहुला र बेहुली मात्र होइन जन्ती र लोकन्ती समेत निर्वस्त्र भएर गरिने विवाह होला भन्ने सबैको सहज अनुमान हुन्छ । विश्वमा यस्ता खाले निर्वस्त्र विवाह गरेर किर्तिमान कायम गरेका विभिन्न खाले समाचार पनि बेलाबेलामा आउने गरेका छन् । पछिल्लो समयमा चीनमा समेत निर्वस्त्र विवाह लोकप्रिय बन्दै गएको छ । तर चीनको निर्वस्त्र विवाह त्यस्तो नांगै भएर गरिने विवाह भने होइन ।

समाचार अनुसार चीनमा निर्वस्त्र विवाह भनिने त्यस्तो विवाह लुगा नलगाइकन गरिने विवाह नभै विना दाइजो गरिने विवाह हो, जुन पछिल्लो समयमा लोकपि्रय बन्दै गएको छ । विवाहमा कार तथा घर दाइजो दिने प्रथा चीनमा समेत छ ।

तर त्यसको साथसाथै दाइजो विनाको निर्वस्त्र विवाहको परम्परा समेत रहेको छ । पछिल्लो समय दाइजो विवाह भन्दा निर्वस्त्र विवाह गर्न धेरै जनाले मन पराउने गरेको एक अध्ययनले देखाएको छ ।

१३ अगष्टका दिन पर्ने चिनिया भ्यालेन्टाइन डे का अवसरमा चीनका विभिन्न ५ वटा ठूला सहरका झण्डै १६ लाख जना मानिसमा गरिएको सर्भेक्षणले यस्तो देखाएको छ ।

चाइना डेलीका अनुसार चिनिया युवाहरुमा निर्वस्त्र विवाहप्रतिको क्रेज बढ्दो छ । सर्भेक्षणमा ४५ प्रतिशतले निर्वस्त्र विवाहलाई मन पराएका छन । तर अहिले सम्म चीनमा केवल ३० प्रतिशत विवाह मात्र दाइजो विना हुने गरेका छन् ।