काठमाडौँ, ३० साउन । उच्चस्तरीय राजनीतिक समिति र सङ्घीय लोकतान्त्रिक मोर्चाबीचको वार्ता सहमति बिना टुङ्गिएको छ । नयाँ बानेश्वरस्थित संविधानसभा भवनमा आज भएको वार्ता छोटो समय मात्र बसी टुङ्गिएको थियो । मधेसी जनअधिकार फोरम नेपालका अध्यक्ष उपेन्द्र यादवले आज औपचारिकरुपमा वार्ता विषयवस्तुमा प्रवेश नगरी टुङ्गिएको जानकारी दिनुभयो । उहाँले भन्नुभयो, “आज मुख हेराहेर मात्र भयो, वार्ताका विषयवस्तुमा प्रवेश भएन ।”

वार्ताको क्रममा उच्चस्तरीय राजनीतकि समितिभित्र दलहरूबीच फरक फरक धारणा देखिएको र वार्ताप्रति समिति गम्भीर नदेखिएको  बताउनुभयो । नेकपा (एमाले)का पोलिटब्युरो सदस्य रघुजी पन्तले छोटो समय मात्र वार्ता भएको र भोलि पुनः छलफल गर्ने गरी आजको वार्ता टुङ्गिएको बताउनुभयो । समिति र मोर्चाबीच भोलि साँझ ५ बजे पुनः वार्ता हुने बताइएको छ ।