०७ आषाढ, काठमाडौं । सरकारले दार्चुलाको बाढी पिडितको सहयोगका लागि ५० करोड रुपैयाँ विनियोजन गर्ने निर्णय गरेको छ । शुक्रबार बसेको मन्त्रीपरिषदको बैठकले बाढी पहिरोबाट प्रभावित दार्चुला सदरमूकामको भौतिक संरचना र सडक निमार्ण कार्यका लागि ५० करोड छुट्याइएको हो । सरकारले बाढीपिडितको उद्धार तथा उनीहरुलाई राहतको क्रम तिब्र रुपमा अघि बढाउने निर्णय गरेको सरकारका प्रवक्ता सुचना तथा संचारमन्त्री माधवप्रसाद पौडेलले जानकारी दिनुभयो । 

यसअघि सरकारले बाढीपिडितका परिवारलाई ४० –४० हजार रुपैयाँ राहत दिने र दार्चुलाजिल्लामा पुननिर्माणका लागि ५० करोेड रुपैयाँ दिने घोषणा गरीसेको थियो । त्यस्तै सरकारले सशस्त्र प्रहरी बलमा ३ हजार २ सय ४३ जना दरबन्दी थप्न निर्णय गरेको छ । त्यस्तै सरकारले ६ जना सचिवको सरुवा गर्ने निर्णय समेत गरेको छ । 

विज्ञान प्रविधि तथा वातावरण मन्त्रालयका सचिव केशवप्रसाद भट्राईलाई अख्तियार दुरुपयोग अनुसन्धान आयोग, सुदुरपश्चिमका क्षेत्रीय प्रशासक आत्मराम पाण्डेलाई रक्षा मन्त्रालयमा, सोमलाल सुवेदीलाई शिक्षाबाट विज्ञान, प्रविधि तथा वातावरण मन्त्रालयमा, नारायणगोपाल मलेगोलाई निर्वाचन आयोगबाट शिक्षा मन्त्रालयमा सरुवा गरिएको हो ।

त्यस्तै सचिव नरेन्द्र दाहाललाई महालेखा नियन्त्रकको कार्यालयबाट शिक्षा मन्त्रालय, मध्यमाञ्चल क्षेत्रीय प्रशासक उद्धव बाँस्कोटालाई महालेखा नियन्त्रकको कार्यालयमा सुरुवा गरिएको छ ।सुदुरपश्चिम क्षेत्रीय प्रशासक पाण्डेले भने बाढीपहिरोबाट भएको क्षतिको राहतको काम सकेर मात्रै रक्षामन्त्रालय आउने सञ्चारमन्त्री पौडेलले जानकारी दिनुभयो । बैठकले केन्द्रयीय बाल कल्याण समितिको कार्यकारी निर्देशकमा तारक धिताललाई नियुक्त गरेको छ ।