१३ चैत्र, काठमाडौं । रङ्गहरुको पर्व फागू अर्थात होली, सद्भाव र आत्मीयता साटासाट गरि मंगलबार काठमाडौं उपत्यका लगायत पहाडी जिल्लाहरूमा हर्षोल्लासका साथ मनाइएको छ । वसन्त ऋतुको आगमनको सुरुवाती यस पर्व एकआपसमा आत्मियता र मैत्री भाव प्रकट गर्न सामूहिक रुपमा भेला भई रङ्ग दलेर मनाउने गरिन्छ । गत विहिबार फाल्गुन शुक्ल अष्टमीका दिन बिहानको शुभसाइतमा राजधानीको वसन्तपुरमा चीर ठड्याएपछि औपचारिक रुपमा होली पर्व सुरु भएको हो । त्यस चीरलाई आज राति टुँडिखेलको मध्यभागमा पु¥याइ दाह गरेपछि होली सकिने भएपनि यसपालि भोलि बिहानको साइतमा चीर दाह गरिएपछि साता व्यापी होली सकिने छ । सत्ययुगमा विष्णुका भक्त प्रल्हादलाई मार्न हिरण्यकश्यपुले आगोबाट नजल्ने र नमर्ने वरदान पाएकी होलिकालाई काखमा लिएर आगोमा बस्न लगाउंदा भक्त प्रल्हादलाई केहि नभएको तर होलीका आफैं जलेर नष्ट भएकीले असत्यममाथि सत्यको विजय भएको विश्वासस्वरुप होली पर्व मनाउन थालिएको जनविश्वास छ । होली तराई क्षेत्रमा भने भोली मनाइन्छ । यसैबिच होलीमा उत्श्रृखल गतिबिधी गरेको भन्दै प्रहरीले राजधानीका बिभिन्न स्थानबाट २ सय ४६ जना पक्राउ गरेको छ । जथाभावी लोला, रंग र पानी छ्याप्नेलाइ पक्राउ गरीएको प्रहरीले जनाएको छ ।