२ भदौ, काठमाण्डौ । प्रधानमन्त्रीका राजनीतिक सल्लाहकार देवेन्द्र पौडेलले राष्ट्रपतिले शुक्रवारमात्रै अस्कीकृत गर्नु भएका चुनावसम्वन्धि अध्यादेश जस्ताको तस्तै फेरि राष्ट्रपति समक्ष पठाउने तयारी भइरहेको वताउनु भएको छ । पौडेलले सरकारले राष्ट्रपति समक्ष सिफारिस गरेका चुनावसम्बन्धी अध्यादेश फिर्ता पठाउनु अलोकतान्त्रिक र असंवैधानिक भएको वताउनुभयो ।

राजधानीमा शनिवार आयोजित कार्यक्रममा पौडेलले भन्नुभयो,’ राष्ट्रपतिले सरकारले सिफारिस गरेका अध्यादेश जारी गर्नुको अर्को विकल्प छैन। त्यसैले फिर्ता आएको अध्यादेश अन्तर्राष्ट्रिय कानुनअनुसार फेरि राष्ट्रपतिसमक्ष जस्ताको तस्तै पठाउँछौ।’ अध्यादेश फिर्ता पठाउनु लोकतान्त्रिक पद्धतिका लागि हितकर नभएको भन्दै पौडेलले राष्ट्रपतिकै कारण चुनाव नहुने वातावरण सिर्जना हुन लागेको आरोप लगाउनुभयो । चुनाव हुन नसकेकाले अध्यादेश जारी गर्न आवश्यक नरहेको भन्ने राष्ट्रपति कार्यालयको वक्तव्यप्रति पौडेलले आपत्ति जनाउनुभयो । पौडेलले भन्नुभयो,’ चुनावसम्बन्धी कानुन पहिला बनाएर चुनाव घोषणा गर्न निर्वाचन आयोगले गरेको आग्रह अनुसार नै अध्यादेश ल्याउन लागिएको हो । अध्यादेश जारी नगरिदिएपछि कसरी कानुन बन्छ र चुनाव हुन्छ ? ‘ उहाँले चुनावका लागि राष्ट्रिय सहमति र अध्यादेश दुई मात्रै विकल्प रहेकाले सहमति जुट्न नसकेकाले सरकारले अध्यादेशको विकल्प रोजेको प्रष्ट पार्नुभयो । एक फरक प्रसंगमा पौडेलले प्रतिपक्षी दलहरुले राजीनामा माग्दैमा यथास्थितिमा प्रधानमन्त्रीले राजीनामा नदिने प्रष्ट पानुभयो । यथास्थितीमा प्रधानमन्त्रीले राजीनमा दिदा मुलुक झनै संवैधानिक संकटमा फस्ने र मुलुक अराजकतामा फस्ने पौडेलले वताउनुभयो । पौडेलले दलहरुवीच राष्ट्रिय सहमति जुटे प्रधानमन्त्री एकमिनेटपनि कूर्सीमा नबस्ने स्पष्ट पार्नु भयो ।