१७ साउन, काठमाण्डौ । मूख्य सचिव नियुक्तिलाई लिएर सचिवहरुले राजीनामा दिने क्रम वढेपछि प्रधानमन्त्री डा वावुराम भट्टराईले सचिवहरुसंग सामूहिक छलफल गर्नु भएको छ । मन्त्रिपरिषदको कार्यालय सिंहदरवारमा वुधवार भएको सचिवहरुसंगको सामूहिक छलफलमा प्रधानमन्त्री भट्टराईले आफूलाई सहयोग गर्न सचिवहरुलाई आग्रह गर्नु भएको हो ।

वैठकमा प्रधानमन्त्री भट्टराईले सचिव लीलामणि पौडेललाई मूख्यसचिव नियुक्त गर्नुको कारणवारे सचिवहरुलाई जानकारी गराउनु भएको प्रधानमन्त्री निकट स्रोतले जनाएको छ । छलफलमा प्रधानमन्त्री मूख्य सचिव प्रधानमन्त्रीको नजिकमा रहेर काम गर्न व्यक्ति भएकाले र पौडेल कार्यकुशलताका हिसावले सवैभन्दा अग्र पंक्तिमा भएकाले पौडेललाई नियुक्त गरिएको वताएको स्रोतले जनाएको छ । गत आइतवार मन्त्रिपरिषदको वैठकले प्रधानमन्त्री कार्यालयमा कार्यरत ८ औँ बरियाताका सचिव लिलामणि पौडेललाई मूख्य सचिवमा बढुवा गरेपछि बरिष्ठता, विधी र मर्यादा मिचेकोप्रति असन्तुष्टी जनाउँदै चार सचिवले राजीनामा दिइसकेका छन् ।  नियुक्ती प्रति असन्तुष्टी जनाउदै राजीनामा दिने सचिवहरुमा निर्वाचन आयोगका सचिव शंकर प्रसाद कोइराला, प्रधानमन्त्री कार्यालयका कानुनी सचिव त्रिलोचन उप्रेति, गृह सचिव सुशील जंग राणा र लोकसेवा आयोगका सचिव श्याम मैनाली रहेका छन् ।