१३ साउन, वीरगञ्ज । भारतबाट एलपी ग्याँस लिएर भित्रने गाडी फर्किदा बुलेट (ग्यास राख्ने भाँडो) मा गाँजा/चरेस बोकेर जाने गरेको पाईएको छ ।

गाँजा ओसारपसारमा प्रहरीले कडाई गरेपछि कारोवारीले ग्यास खन्याएर रित्तो र्फकने गाडीमा अवैध रुपमा निकासी गर्न थालेको पाईएको हो । सीमावर्ती रक्सौलस्थित भारतीय भन्सारले ग्यास खन्याएर फर्केको गाडीबाट हालै १ सय ८२ किलो (स्थानिय बजारमा सात लाख रुपैँया मूल्यको) गाँजा बरामद गरेपछि तस्करीको नयाँ तरिका खुलेको हो ।

सुराकीको आधारमा भन्सारको टोलीले मोतीहारी नजिक एचआर ६९-७३८० नम्बरको ग्यास बोक्ने गाडीबाट गाँजा बरामद गरेको रक्सौल भन्सारका प्रमुख जीसी यादवले जानकारी दिएको खबर कान्तिपुर दैनिकले छापेको छ । यादबका अनुसार ग्यास खन्याएर र्फकने गरेका गाडीमा केही सामान भए नभएको जाँच्न लड्ठीले बुलेटमा हानेर जाँच गरिन्छ । रित्तो र लोड भएको अवस्थामा फरक/फरक आवाज आउने भएकाले यस्तो तरिका अपनाईएको हो । तर, ‘हामीलाई झुक्याईएको हनु सक्ने देखियो,’ उनले भने ।

वीरगञ्जका एक गाँजा कारोबारीका अनुसार भन्सार कर्मचारीहरुलाई झुक्याउन उनिहरुले बुलेटको आधाभाग मात्र गाँजा भर्ने गरेको पनि बताएका छन् । रवरको ट्युवले बाँधेर काटुन टेप लगाई त्यसलाई यता उता हुन नदिने गरि राखिने गरेको पनि व्यापारीहरुको भनाई छ ।

वीरगञ्जमा एक किलो गाँजा तीन देखि पाँच सयसम्ममा विक्ने तर सोही गाँजालाई भारतमा पुर्‍याउन सके एकहजार पाँचसय भारतीय रुपैयाँमा विक्रिहुने गरेको छ ।