२७ मंसिर, काठमाडौं । मनाङ् मस्र्याङ्दी क्लब नेपाल पुलिस क्लबलाई २–१ गोल अन्तरले पराजित गर्दै राजधानीमा जरी एनसेल कप फुटबल प्रतियोगीताको सेमिफाईनलमा प्रवेश गरेको छ । त्रिपुरेश्वर स्थित दशरथ रंगशालामा बिहीबार भएको अन्तिम क्वाटरफाईनल खेलको पहिलो हाफमा नेपाल पुलिसले १ गोलको अग्रता लिएपनि दोसो हाफमा मनाङले २ गोल गर्दै सेमिफाईनलको स्थान पक्का बनाएको हो ।

जितका लागि मनाङ मस्र्याङ्दीका सुजल श्रेष्ठले ६८ औँ मिनेटमा र योना ईलाजले ८६ औँ मिनेटमा एक–एक गोल गरेका हुन् । नेपाल पुलिसका लागि भने रविन श्रेष्ठले पहिलो हाफ चलिरहँदा २९ औँ मिनेटमा एक गोल गरे ।

जित संगै मनाङले अब सेमिफाइनल खेलमा नेपाल आर्मीको सामना गर्नुपर्नेछ । मनाङ समुह डि को विजेता भन्दै क्वाटरफाईनलमा प्रवेश गरेको हो भने पुलिस समुह सी को उपविजेता बनेको थियो । यस अघि हिजो भएको खेलमा ब्वाइज युनियन ए डिभिजन लिग विजेता थ्रिस्टारलाई २–१ ले पराजित गर्दै सेमीफाइनलमा प्रबेश गरीसकेको छ ।