२ कात्तिक, धादिङ । नेकपा (एमाले)का नेता केपीशर्मा ओलीले समयमै शान्ति र संविधान पाउन प्रत्यक्षमा एमालेलाई कम्तीमा १२१ सिटसहित स्पष्ट बहुमत आवश्यक भएको र त्यो नेपाली जनताले पूरा गर्ने बताउनुभएको छ । आगामी संविधानसभाको निर्वाचनमा एमालेलाई जनताले बहुमत दिएर विजयी गराउने उहाँको विश्वास छ ।

प्रेस चौतारी नेपाल धादिङले धार्केमा आयोजना गरेको पत्रकार सम्मेलनमा नेता ओलीले अब बन्ने संविधानसभा सशक्त, परिणाममुखी र समाधान दिनसक्ने संविधानसभा बन्ने ठोकुवा गर्नुभयो । नेता ओलीले मङ्सिर ४ पछिको संविधानसभाले लोकतान्त्रिक मूल्य मान्यता बोकेको भन्दै जनताले चाहेको संविधान दिने बताउनुभयो ।

सबै जातजाति, भाषाभाषी, सम्प्रदायको पहिचानलाई सम्मान गर्ने एमाले राष्ट्रिय एकताको पक्षमा रहेकाले नेपाली जनताले आगामी निर्वाचनमा एमालेलाई रोज्ने उहाँले दाबी गर्नुभयो । नेता ओलीले सल्यानटारको उचित सदुपयोग, ऐतिहासिक र पर्यटकीय चमेरे गुफा, त्रिशूली नदी, गणेश हिमालजस्ता पर्यटकीय पदमार्ग भएको समृद्ध सम्पदाको विकासमा आफ्नो ध्यान केन्द्रित भएको बताउनुभयो ।