२१ श्रावण, काठमाडौं । देशव्यापीरूपमा सङ्कलन गरेको मतदाता नामावलीमा देखिएका गल्ती तथा कमजोरीलाई सच्याउने काम अन्तिम चरणमा पुगेको  छ । निर्वाचन आयोगले देशव्यापी रूपमा गाविस कार्यालय र नगरपालिकाका वडाहरूमा नमिलेका मतदाता नामावली सच्याउने काम यही साउन ८ गते सम्पन्न गरेपनि रुजु गर्ने काम जिल्ला निर्वाचन कार्यालयहरूमा जारी राखेको आयोगका प्रवक्ता वीरबहादुर राईले जानकारी  दिनुभएको हो ।

नामावलीमा सकेसम्म कम समस्या रहोस् भन्ने ध्येयका साथ रुजु कार्य जारी राखिएको र यो क्रम यही साउन २२ गतेसम्म कायम रहने आयोगको भनाइ छ । सबै काम सम्पन्न गरिसकेपछि यही साउन २४ गते पूर्ण नामावली प्रकाशन गर्ने आयोगले तयारी गरेको छ । आयोगले एक करोड २३ लाखले मतदाता नामावलीमा नाम दर्ता गराएको जनाएको थियो ।

त्यसमा छ देखि सात लाख मतदाता छुटेको आयोगले अनुमान गरेको छ । आयोगले मतदाता नामावलीमा नाम दर्ता गर्न छुटेका नागरिकलाई निर्वाचन कार्यसूचीमा प्रभाव नपर्ने गरी थप केही दिन म्याद थप गर्ने तयारी समेत गरिरहेको  छ ।