४ जना नेपाली मंगल ग्रहमा जानको लागि तयार भएको छ । उनीहरु मंगल ग्रहबाट फर्कन भने पाउँने छैनन् । मार्स वान नामको सो परियोजनाका लागि उनीहरुले मंगलग्रहमा जानका लागि आवेदन दिएका छन् । उनीहरुले मात्र होईन  हालसम्म १ लाखभन्दा बढी अन्यले म)गल ग्रहमा जाने सपना देख्दै आवेदन भरेका छन् । नेपालका समिर न्यौपाने, प्रकाश सुवेदी, अनिल पोखरेल र केशव पाध्येले रातो ग्रहमा जान निःशुल्क एकतर्फी टिकटका लागि आवेदन दिएका हुन् । मार्स वानले सन् २०२२ सम्ममा मंगलमा मानिस पठाइसक्ने बताएको छ ।

सानैदेखि स्टार ट्रेक र स्टार वार हेरेर हुर्किएका २१ वर्षीय समीर न्यौपानेले मार्स वानलाई दिएको भिडियो आवेदनमा आफूले सधैं ताराहरूमा गएको सपना देख्ने गरेको बताएका छन् । ‘मंगल ग्रहमा जान म जे पनि गर्न सक्छु, कृपया मलाई एउटा मौका दिनुहोस्, म तपाईंलाई निराश बनाउने छैन,’ उनी भन्छन्, ‘मेरो मुलुक नेपालको लागि र पृथ्वीवासीका लागि म त्यहाँ जान तयार छु ।’ अन्तरिक्षमा चाख राख्ने समीरले आफूलाई वेबपेज डिजाइनिङ, जाभा र भावी जेट यातायात प्रविधिले निकै आकर्षित गर्ने गरेको उल्लेख गरेका छन् । पर्यटन क्षेत्रमा काम गर्ने ३१ वर्षीय केशव पाध्येले आफूलाई चुनौती मन पर्ने र नयाँ कुरा हेर्न र अनुभव गर्न मन पर्ने बताएका छन् ।