०७ श्रावण, काठमाडौं । मधेसी जनअधिकार फोरम नेपालका अध्यक्ष उपेन्द्र यादवले केही नेता र निर्वाचन आयोगले चुनाव हुन्छ भन्दैमा चुनाव हुन नसक्ने ठोकुवा गर्नुभएको छ । मंसिर ४  मा कुनै हालतमा निर्वाचन नहुने भन्दै उहाँले संविधान बन्ने सुनिश्चितता नभएसम्म संविधानसभाको निर्वाचनको कुनै औचित्य समेत नभएको बताउनुभयो । 

राजधानीमा आयोजित एक अन्तरक्रियामा अध्यक्ष यादवले आफ्नो पार्टीले संविधानको सुनिश्चिततासँगै संविधानसभाको निर्वाचन चाहेको भन्दै मंसिर ४ मा त्यस्तो वातावरण नबन्ने बताउनुभयो ।

पछिल्लो समयमा ४ दलिय सिण्डीकेट र सरकारले गरेका निर्णयले लोकतन्त्रलाई नै समाप्त पार्ने खतरा बढेको भन्दै उहाँले संविधानसभाको नाममा परिवर्तन नै खतरामा परेको बताउनुभयो ।

मोहन बैद्य नेतृत्वमा रहेको नेकपा मााअ‍ेवादीसँग आफ्नो पार्टीको कुनै सम्बन्ध नरहेको प्रष्ट पार्दे उहाँले बर्तमान अबस्थामा गोलमेच सम्मेलनले निकास निस्कन नसक्ने उल्लेख गर्नुभयो । संविधान सभा र संसद एउटै भएका कारण पनि देशमा संविधान बन्न नसकेको उहाँले टिप्पणी गर्नुभयो ।