३१ आषाढ ।धादिङ, सिराहा र कैलालीमा भएको छुट्टाछुट्टै सवारी दुर्घटनामा परी ७ जनाको मृत्यु भएको छ । आज अर्घाखांचीबाट काठमाडौं आउंदै गरेको लु १ ख ७३ ३३ नं को बस पृथ्वीराजमार्ग अन्तर्गत धादिङको थाक्रेमा दुर्घटना हुँदा ३ जनाको मृत्यु भएको छ ।

             अन्य १५ जना घाईते भएका छन् । मृत्यु हुनेमा अर्घाखांची रनपाने–४ का पुरन बुढाथोकी, अर्घाखाची सीमपानी–५ का देव बहादुर पुन र अर्घाखांची खिन्जी–१ का राधा पौडेल रहेको जिल्ला प्रहरी कार्यालय अर्घाखांचीले जनाएको छ । घाईतेहरु १५ जना मध्ये १२ जनाको काठमान्डौंका बिभिन्न अस्पतालहरुमा उपचार भैरहेको छ । बस अनियन्त्रित भई थाँक्रे नजीकै जुँगेखोलामा सडकबाट अन्दाजी ३० मिटर तल खसेर दुर्घटना भएको प्रहरीले जनाएको छ ।

              यस्तै सिरहामा ट्याक्टर पल्टिँदा तीन जनाको ज्यान गएको छ भने अन्य ११ जना घाईते भएका छन् । सिरहाको कचनारीबाट महोत्तरीको पडोल स्थान तर्फ जादै गरेको ना ४ त ४७ ४३ नम्बरको ट्याक्टर आज विहान कर्जनामा दुर्घटना हुँदा सिरहा ईटाटार ३ का मुकेश यादव, ईटाटार ४ का रामसति देवी यादव र जिझौलकी गुलाब देवी यादवको मृत्यु भएको जिल्ला प्रहरी कार्यालय सिरहाले जनाएको छ । 

   यता कैलालीको धनगढी स्थित शिवनगरमा गएराति जीप र मोटरसाईकल एक आपसमा ठोक्किदा मोटरसाईकलमा सवार ४८ वर्षीय तीलादेबी चन्दको मृत्युको भएको र चालक केशब चन्द घाईते भएको जिल्ला प्रहरी कार्यालय कैलालीले जनाएको छ ।  ना २ च ३५५४ नम्बरको जीप र से १ प १०८४ नम्बरको मोटरसाईकल एक आपसमा ठोक्कीएको थिए ।