आगामी निर्वाचनलाई स्वतन्त्र, निष्पक्ष र विश्वसनीय तुल्याउने उद्देश्यले निर्वाचन आयोगले निर्वाचन आचारसंहिता जारी गरेको छ । निर्वाचन आयोग ऐन, २०६३ को दफा २८ वमोजिम आयोगले नेपाल सरकार, सरकारी तथा अर्धसरकारी संस्थाको कार्यालय र कर्मचारी तथा स्वयम्सेवक, गैरसरकारी संस्था र आम सञ्चार माध्यमले पालना गर्नुपर्ने गरी आज स्वीकृत गरेको हो । 

     निर्वाचन सम्पन्न गर्न सरोकारवालाले पालना गर्नुपर्ने आचारसंहिता व्यवस्थित गर्न सरकार, विभिन्न राजनीतिक दल, सञ्चार माध्यम, राष्ट्रिय तथा अन्तर्राष्ट्रिय गैरसरकारी संस्थाका प्रतिनिधिहरु र नागरिक समाजसँग परामर्श गरी सोहीका आधारमा प्रस्तावित मस्यौदामा संशोधन गरी मस्यौदालाई अन्तिमरुप दिएको आयोगले जनाएको छ । 

      जारी आचारसंहितामा नयाँ प्रावधानको रुपमा विगतमा गैरसरकारी संस्थाको कार्यविधि छुट्टै रहेकामा अहिले संहिताको एउटै पाटोमा समावेश गरिएको छ । यसैगरी निर्वाचन प्रचारप्रसार लैङ्गीक र अपाङ्गमैत्री हुनुपर्ने, मतदानका दिन अपाङ्गहरुलाई सवारी साधनमा मतदान केन्द्रसम्म लैजान पाइने व्यवस्था गरिएको छ । आयोगले आचारसंहितामा निर्वाचनका लागि ११ वटा दुर्गम जिल्लामा हेलिकप्टर प्रयोग गर्न पाउने व्यवस्था गरेको छ ।

    ती जिल्लाहरुमा कर्णालीका पाँच वटासहित सोलुखुम्बु, मनाङ, मुस्ताङ, बझाङ, बाजुरा र जाजरकोट रहेका छन् । यसैबीच निर्वाचन आयोगले आगामी मङ्सिर ४ गते हुने संविधानसभा निर्वाचनका लागि सात अर्ब ७५ करोड ६४ लाख ९३ हजार २१० रुपैयाँ बजेट विनियोजन गरेको छ । आचारसंहिता आगामी श्रावण ७ गतेदेखि लागु हुने आयोगले जनाएको छ ।