०९ आषाढ धादिङ । एकीकृत नेकपा माओवादीका नेता तथा ताम्सलिङ राज्य समितिका संयोजक विश्वभक्त दुलालले एकीकृत माओवादीले दुई तीहाई मत ल्याएरै छाड्ने बताउनुभएको छ । आईतबार वाईसिएल धादिङको दोस्रो तथा नेपाल राष्ट्रिय दलित मुक्ति मोर्चा धादिङको तेस्रो जिल्ला सम्मेलनमा नेता दुलालले नपाली राजनीतिमा परिवर्तनशील पार्टी एकीकृत नेकपा माओवादी नै भएको दावी समेत गर्नुभयो । सरकारले घोषणा गरेको मंसिर ४ को संविधान सभाको निर्वाचन स्वागत योग्य भएको भन्दै उहाँले निर्वाचनको विबल्प नरहेको तर्क गर्नुभयो । नेता दुलालले केही प्रतिगामीहरुले अझै पनि संविधान सभाको चुनाव नचाहेको उल्लेख गर्नुभयो । यस्तै मजदुर नेता शालिकराम जमरकट्टेलले काँग्रेस पूँजीवादी र एमालेको कुनै एजेन्डा र विचार नभएकाले जनताहरुले एकीकृत माओवादीलाई नै विश्वास गरेको बताउनुभयो । उहाँले चुनावी अभियानमा लाग्न पार्टीका कार्यकर्ताहरुलाई आग्रह समेत गर्नुभयो । मंसिर ४ मा जसरी पनि संविधान सभाको निर्वाचन गराउनु पर्ने भन्दै जमर्कटेलले सबैमा निर्वाचन सफल पार्न एकजुट हुन आग्रह गर्नुभयो ।