काठमाडौं, ९ जेठ । सर्लाही जिल्ला लालबन्दी–७ घर भई महाराजगन्ज बस्ने ४२ वर्षीया सुन्तली माया लामालाई हत्या गर्ने दुईजनालाई महानगरीय प्रहरी अपराध महाशाखाको प्रहरी टोलीले पक्राउ गरेको छ । 

पक्राउ पर्नेमा गोरखा जिल्ला आरुआरवाङ–८ घर भई सशस्त्र प्रहरी वल निलबराही गण बलम्बु दरवन्दी भई निर्मल निवासमा सुरक्षा गार्डमा कार्यरत २५ वर्षीय कृष्णबहादुर बराम र गोरखा जिल्ला आरुआरवाङ–१ घर भई छाला कारखाना बुढानीलकण्ठमा काम गर्ने २६ वर्षीय पूर्णबहादुर बराम रहेका छन् । मृतक महिला तथा अभियुक्तहरूबीच अवैध सम्बन्ध तथा पैसाको लेनदेनको विषयमा विवाद उत्पन्न भएपछि अभियुक्तहरूले मृतकलाई बुढानीलकण्ठ–६ स्थित चिस्यानीको जङ्गलमा लगेर यही जेठ ६ गते राति घाँटी थिची टाउको तथा अनुहारमा ढुङ्गा प्रहार गरी हत्या गरेको केन्द्रीय प्रहरी समाचार कक्षले जनाएको छ  । रासस