७ भाद्र । नेपाली काङ्ग्रेसका केन्द्रीय सदस्य अर्जुननरसिंह केसीले पहिचानको विवादमा कुनै दल अल्झिनाको सट्टा त्यसलाई जनमतसङ्ग्रहमा गएर टुङ्ग्याउनुपर्ने बताउनुभएको छ । नेपाल प्रेस युनियन नुवाकोटले आज विदुरमा गरेको पत्रकार भेटघाटमा नेता केसीले ‘एकल जातीय पहिचान कि साझा पहिचान’ भनी नेपाली जनताको जनमत लिएमा त्यसबाट आउने परिणामले सकारात्मक निकास दिने बताउनुभयो । ‘जातीय पहिचानको नाममा विभाजनको विषवृक्ष रोपेर त्यसबाट क्षणिक फाइदा लिने कोसिस भएकाले जनमतसङ्ग्रहमा जानु उपयुक्त हुन्छ’ उहाँले भन्नुभयोे । जनताको निर्णय नै  सर्वस्वीकार्य हुने बताउँदै केसीले सुडान, नाइजेरिया, भारतको आसामलगायत क्षेत्रजस्तै हामी जातीय द्वन्द्वको नराम्रो भुमरीमा फस्ने बताउनुभयो । संविधानसभा पुनःस्थापना गर्नु असान्दर्भिक भएकाले ताजा जनादेशमा जानुपर्ने नेता केसीको धारणा छ । चार वर्षसम्म कुनै काम गर्न नसकेको संविधानसभालाई फेरि ब्युँताउनु उचित नहुने केसीको भनाइ छ ।