राप्ती नदीमा आएको भीषण बाढीले जिल्लाको होलिया, गङ्गापुर, मटेहिया, फत्तेपुर गाविसका अधिकांश गाउँ डुबानमा परेका हुन् । बाढीले होलियाका २२३ घर विस्थापित भएका छन् ।  राति बस्ती नै डुबानमा परेपछि होलियाको वडा नं २, ३, र ४ का स्थानीयवासी विस्थापित भएका हुन् । विस्थापित परिवारलाई छिमेकी उचुवा गाउँमा स्थानान्तरण गरिएको छ ।

बाढी आउने पूर्व जानकारी पाएलगत्तै स्थानीयवासी सुरक्षित स्थानतर्फ लागेको प्रहरी नायब उपरीक्षक उदय तामाङले जानकारी दिनुभयो । यस्तै राप्ती नदीको बाढीले होलिया गाविसका सबै वडा, गङ्गापुरको वडा नं १, २, ३, ६, ८, र ९ मटैहियाको वडा नं १, २, ३ र ४ फत्तेपुरको वडा नं ४, ५ र ६ वडा डुबानमा परेका छन् ।

गाउँ नै डुबेर घरभित्र पानी पसेपछि त्यहाँका स्थानीयवासी छाप्रो, खाट, अग्लो स्थान र त्यस क्षेत्रमा निर्माण गरिएको बाढीग्रस्त उद्धार सेन्टरमा गएर बास बसेको नेपाल रेडक्रस सोसाइटी गङ्गापुर उपशाखा सचिव सोहनलाल यादवले जानकारी दिनुभयो । यादवका अनुसार अहिले पनि घरभित्र पानी जमेकाले खाद्यान्नलगायतका सामान बगेर नष्ट भएको छ ।

शुक्रराति ८ मिटर पुगेको राप्ती नदीमा पानीको सतह घटे पनि खतराको सङ्केत पाँच मिटर आसपासमै रहेको कुसुम जलमापन केन्द्रले जनाएको छ । रासस