४ भाद्र प्युठान । नेकपा एमालेका कार्यवाहक अध्यक्ष बामदेव गौतमले संविधान भित्रै रहेर चालिएको राष्ट्रपतिको कदम स्विकार्ने बताउनुभएको छ । प्रेस चौतारी नेपाल प्यूठानले आज विजुवारमा गरेको पत्रकार सम्मेलनमा उहाँले अहिलेको संक्रमणकालिन अवस्थामा मुलुकलाई निकास दिन अन्तिम विकल्प राष्ट्रपति भएको बताउनुभयो । सरकारको असंवैधानिक कार्यलाई राष्ट्रपतिले अनुमोदन नगरेर ज्यादै राम्रो काम गरेको नेता गौतमको भनाइ छ । पत्रकारहरुको प्रश्नमा नेता गौतमले प्रतिपक्षीहरुले राष्ट्रपतिलाई मुछ्ने काम नगरेको स्पष्ट पार्दै राष्ट्रपतिले स्वंयम सहमतिका लागि दलहरुलाई आग्रह गरिरहेको जानकारी दिनुभयो । अहिलेको सडकको राजनीतिलाई संसदमा पु¥याउनु राष्ट्रपतिको भुमिका भएको बताउनुभयो । नेता गौतमले दलहरुवीच सहमतिको वातावरण बनाएर अघि बढ्नुपर्ने अवस्थामा सत्ताधारीहरुले मुठभेडको सिर्जना गराउन लागेको आरोप लगाउनुभयो । सहमतिको वातावरण हुन नदिन सत्ताधारी दलहरुनै लागेको उहाँको भनाइ छ ।