३ भाद्र काठमाडौं । प्रधानमन्त्री डा बाबुराम भट्टराईले बजार अनुगमन प्रभावकारीरुपमा अगाडि बढाउन निर्देशन दिनुभएको छ । नेपालीको धेरै चाडबाडहरु आइरहेकाले अनुगमनको काम प्रभावकारीरुपमा अगाडि बढाउनका लागि तत्काल कदम चाल्न र कानुनविपरीत काम गर्नेहरुलाई कुनै पनि हालतमा नछाड्न निर्देशन दिनुभएको हो । वाणिज्य तथा आपूर्ति मन्त्रालयको विकास कार्यक्रम तथा आयोजनाको आर्थिक वर्ष २०६८÷०६९को वार्षिक प्रगति समीक्षा एवम् मन्त्रालयस्तर विकास समस्या समाधान समितिको बैठकलाई आज सम्बोधन गर्दै उहाँले बजारमा आपूर्ति व्यवस्था सहज बनाउनका लागि जस्तोसुकै व्यवस्था गर्न पनि निर्देशन दिनुभयो । उहाँले निर्यात बढाउनका लागि कुन कुन वस्तुमा थप सुविधा दिनुपर्ने भए त्यसको खोजी गर्न र त्यसलाई कसरी कार्यान्वयन गर्न सकिन्छ भन्ने उपाय खोज्न पनि निर्देशन दिनुभएको छ । कार्यक्रममा राष्ट्रिय योजना आयोगका उपाध्यक्ष दीपेन्द्रबहादुर क्षेत्रीले स्वदेशी उत्पादनलाई विशेष जोड दिनुपर्ने बताउनुभयो ।