अस्ट्रिच विश्वको सबैभन्दा ठूलो चरा हो । यो जति ठूलो भएपनि यो चरो नै हो र यसलाई जनावर भन्न मिल्दैन । तर पाकिस्तानको एक प्रान्तिय संसदले भने अस्ट्रिच चरो नभएर जनावर भएको ठहर गरेको छ । पाकिस्तानको पंजाब प्रान्तको अदालतले आफ्नो असिमित अधिकारको प्रयोग गर्दै अस्ट्रिच जनावर भएको बुधबार ठहर गरेको हो । अस्टि्रचलाई जनावर घोषित गर्दै संसदले जनावर सम्बन्धि एक कानुन समेत पारित गरेको छ । प्रान्तीय गभर्नरले अस्ट्रिच जनावर नभएर आयातित चरो रहेको अडान राख्दाराख्दै पनि संसदले आफ्नो अधिकार प्रयोग गरी अस्ट्रिच जनावर नै भएको निर्णय गर्यो । संसदले पारित गरेको कानुनमा जनावर भनेको गाइ, साँढे, भैँसी, राँगो, बाख्रा, भेँडा तथा अस्टि्रच जस्ता घरपालुवा जिव हुन् भन्ने उल्लेख गरिएको छ । अस्टि्रचको वध गरेर मासुका लागि प्रयोग गर्ने कुरालाई वैधानिकता दिने तथा अस्ट्रिचको आयात र पालनलाई बढावा दिन संसदले यस्तो कानुन बनाएको बताइएको छ ।