२६ असोज, डडेल्धुरा । डडेल्धुराको उग्रतारा मन्दिरमा आज बिहानैदेखि मेला लागेको छ । सुदूरपश्चिमकै प्रसिद्ध शक्तिपीठ मानिने सो स्थानमा सुरु भएको मेलामा देशका विभिन्न स्थानबाट सर्वसाधारण पुगेका छन् । किम्वदन्ती अनुसार २५ सय वर्ष पहिले हालको अमरगढी नगरपालिका लटाउली बस्ने साँकी जातिका स्थानीयले हलो जोत्दा हलोको फाली लागेर रगत बगेपछि देवी उत्पन्न भएको र दर्शन दिएपछि त्यस दिनदेखि महागौरी दुर्गा र कालीको स्वरुपमा उग्रतारा भगवतीको पूजा गरिँदै आएको छ ।

मन्दिरमा मेला भर्न कैलाली, कञ्चनपुर, वैतडी, डोटीलगायत भारतबाट समेत दर्शनार्थी आउने गरेका छन् । मेलामा हजारौंको संख्यामा पशु बली दिने गरिन्छ । त्यसैगरी सुदूरपश्चिमका प्रमुख शक्तिपीठ बैतडी जिल्लाको निङलासैनी, देहिमाडौं, त्रिपुरासुन्दरी, मेलौली लगायत विभिन्न देवी मन्दिरहरुमा पनि मेला लागेको छ । देवीदुर्गाले राक्षसरुपी महिषासुरको वध गरेकाले राँगाको बली दिने चलन रहेको छ ।