२२ साउन, धनकुटा । राष्ट्रिय जनमुक्ति पार्टी सम्बद्ध लिम्बुवान् राज्य परिषद्ले आह्वान गरेको बन्दका कारण मंगलबार पूर्वका ९ जिल्लाको जनजीवन प्रभावित भएको छ । विसं १८३१ मा पृथ्वीनारायण शाहले लिम्बुवान् क्षेत्रमा कब्जा गरेको भन्दै यसअघिका वर्षहरु झँै आज पनि कालो दिनका रुपमा बन्द आह्वान गरिएको परिषद्ले जनाएको छ । बन्दका कारण तराई हुँदै पूर्वी पहाडी जिल्ला जोड्ने कोसी राजमार्गसहित अन्य सहायक मार्गहरुमा बिहानदेखि यातायातका साधन सञ्चालनमा आउन सकेका छैनन् ।

त्यस्तै, बजार, पसल, शिक्षण संस्था, उद्योगधन्दा लगायतमा समेत बन्दको प्रभाव देखिएको छ । यातायातका साधन सञ्चालनमा नहुँदा धनकुटा सदरमुकामसहित हिले, सिधुवा, लेगुवा लगायतका स्थानमा यात्रुहरु अलपत्र परेर बसेका छन् । बन्दका कारण घर फर्कन नपाउँदा एसएलसी पूरक परीक्षा र लोकसेवा आयोगको परीक्षाका लागि धनकुटा आएका र आउने क्रममा रहेका परीक्षार्थीहरु समस्यामा परेका छन् ।  यता बजार व्यवस्थापन समितिले धनकुटा बजार भने खुलाएको छ ।