३१ श्रावण, काठमाडौं । सरकारसँग नेपाल अटोमोबाइल डिलर्स एसोसिएसनले वीरगन्ज भन्सार नाकामा रहेका सवारी साधनको जाँचपास अवधि दुई हप्ता बढाइदिन आग्रह गरेको छ । तीन महिनाभित्र भन्सारबाट जाँचपास नगरिएका सवारी साधन जफत गरिने कानुनी व्यवस्थाअनुसार सरकारले प्रक्रिया अघि बढाएपछि एसोसिएसनले थप समय माग गरेको हो ।

एसोसिएसनका पदाधिकारीले अर्थमन्त्री शङ्करप्रसाद कोइरालालाई भेटेर अमेरिकी डलर र युरोको मूल्य वृद्धि, आर्थिक वर्षको अन्त्यका कारण बैंकहरूको कर्जा दिन असमर्थ रहेकाले ती सवारी साधन छुटाउन नसकिएको बाध्यताबारे जानकारी गराएका थिए । सवारी साधन जफत गरिँदा पैठारीकर्ताहरू ठूलो मारमा पर्ने भन्दै एसोसिएसनले एकपटक मौका दिन आग्रह गरेको अर्थमन्त्रीका सञ्चार सल्लाहकार सङ्केत कोइरालाले जानकारी दिनुभयो ।