३१ जेष्ठ, काठमाडौं । नेपाली काँग्रेसका केन्द्रीय सदस्य डा रामशरण महतले देउवाले पूर्वप्रधानमन्त्रीको हैसियतले दुई देशबीचको सम्बन्ध विस्तार गर्न भारत भ्रमणमा जानुभएको बताउनुभएको छ । म्याग्दीमा शुक्रबार नेपाल प्रेस युनियनले आयोजना गरेको पत्रकार सम्मेलनमा नेता महतले पार्टीका वरिष्ठ नेता देउवाको भारत भ्रमणको विषयलाई लिएर शङ्का गर्न नहुने बताउनुभयो ।

         नेता महतले भारतले नेपालको विकास, शान्ति र परिवर्तनका लागि सधँै सकारात्मक भूमिका निभाएको बताउनुभयो । सरकारले चुनावको मिति घोषणा गरिसकेकाले चुनावी माहोल सिर्जना भएको बताउँदै उहाँले चुनावी सरकारको विरोध गरिरहेका दलहरु पनि निर्वाचनमा सहभागी हुनुको विकल्प नरहेको जिकिर गर्नुभयो ।

नेता महतले संविधानसभाको दोस्रो निर्वाचनमा काँग्रेसले कसैसँग मोर्चाबन्दी नगर्ने स्पष्ट पार्नुभयो । मधेसी र माओवादी पनि प्रतिष्पर्धी भएका कारणले उनीहरुबीचको मोर्चाबन्दी प्रयास असफल हुने महतको टिप्पणी थियो । उहाँले अन्तरिम संविधान बन्दासम्म सङ्घीयताको विषय नउठेपनि मधेस आन्दोलनका कारण सङ्घीयताको विषयलाई स्वीकार गर्नुपर्ने बाध्यता आएको बताउनुभयो ।