०३ आषाढ, काठमाडौं । एकीकृत नेकपा माओवादीका अध्यक्ष पुष्पकमल दाहाल ‘प्रचण्ड’ले मङ्सिर ४ गते हुने दोस्रो संविधानसभा निर्वाचनलाई कसैले रोक्न नसक्ने दाबी गर्नुभएको छ ।

विराटनगर विमानस्थलमा आज सञ्चारकर्मीसँग कुरा गर्दै अध्यक्ष दाहालले कसैले धम्की देखाउँदैमा निर्वाचन नरोकिने बताउनुभएको हो । 

सोमबार बिहान बसेको चार दलीय उच्चस्तरीय राजनीतिक संयन्त्रको बैठकले नेकपा–माओवादीलगायत आन्दोलनरत अन्य दलसँग वार्ता गरी जायज माग सम्बोधन गर्ने सहमति भएको जानकारी दिदै दाहालले सबैलाई निर्वाचनमा सहभागी हुन आग्रह गर्नुभयो ।

आन्दोलनरत दलहरुको जायज मागलाई सम्बोधन गर्न सरकारलाई सिफारिस गर्ने विषयमा बैठकमा दलहरुबीच सहमति भए पनि सरकारको विघटन र उच्चस्तरीय राजनीतिक संयन्त्रको खारेजी गर्ने भन्ने कुरा भने मान्य नहुने उहाँले बताउनुभयो ।

उहाँले उपेन्द्र यादव, मोहन वैद्य तथा अशोक राईलाई राजनीतिक संयन्त्रमा सहभागी गराउन आज चार दलबीच गम्भीर छलफल भएको छ भन्दै तर ११ बुँदे सहमति र २५ बुँदे बाधा अड्काउ फुकाउ भङ्ग गर्ने भन्ने कुरा कुनै हालतमा स्वीकार्य नहुने बताउनुभयो ।

एक प्रश्नको जवाफमा अध्यक्ष दाहालले नेकपा–माओवादीलाई पन्छाएर निर्वाचन गर्ने पक्षमा संयन्त्र नरहेको जिकिर गर्नुभयो । दाहालले शान्तिपूर्ण प्रतिस्पर्धात्मक चुनावमा आउन दलहरु डराउन नहुने बताउनुभयो ।