७ भाद्र । सहकारी तथा गरिबी निवारणमन्त्री एकनाथ ढकालले मूलभूत विषयमा सहमति नभएसम्म सरकारको राजीनामाको कुनै अर्थ नभएको बताउनुभएको छ । नेपाल परिवार दलका अध्यक्ष ढकालले आज चितवनको भरतपुरमा पार्टी कार्यकर्ता प्रशिक्षणमा राजनीतिक सहमति नभएसम्म सरकारले राजीनामा नदिने उल्लेख गर्नुभयो । शान्ति, संविधान र सङ्घीयताका विषयमा सहमति जुटे सरकारको राजीनामाको अर्थ रहने उहाँको दाबी थियो । सहमतिको विकल्प नरहेको भन्दै उहाँले बाह्य हस्तक्षेप देशमा बढ्दै गएकाले राजनीतिक दलहरू आपसमा मिलेर अघि बढ्नुपर्नेमा जोड दिनुभयो । मन्त्री ढकालले पार्टी स्वार्थ र हठ दलहरूले नत्यागेसम्म सहमति नहुने बताउनुभयो । विभिन्न कार्यक्रममा सहभागी हुन उहाँ आज चितवन आउनुभएको हो ।