८ भाद्र । नेपाल सरकार मन्त्रीपरिषदको बैठक आज पनि बस्दै छ । अपरान्ह ४ बजे मन्त्रिपरिषदको कार्यालय सिंहदरबारमा बस्ने बैठकमा सरकारले ल्याउन लागेको विभिन्न सात वटा अध्यादेशका विषयमा छलफल हुने प्रधानमन्त्री निकट स्रोतले जनाएको छ । हिजो बसेको मन्त्रिपरिषद् बैठकमा अध्यादेशबारे सामान्य छलफल भए पनि मधेसी दलहरुले थप छलफल गर्नुपर्ने भन्दै समय मागेपछि निर्णय भएको थिएन । आज ती अध्यादेशबारे अन्तिम निर्णय भएर राष्ट्रपति समक्ष पेश हुने सम्भावना रहेको स्रोतले बताएको छ ।
निजामति सेवा ऐन, स्वास्थ्य सेवा, शिक्षा, स्थानीय प्रशासन तथा विभिन्न मन्त्रालयको कार्यविभाजन, संवैधानिक निकायमा पदपूर्ति लगायतका अत्यावश्यक विषयमा सरकारले अध्यादेश ल्याउने तयारी गरेको छ । सरकारले सिफारिस गरेका अध्यादेशहरु राष्ट्रपतिले अनुमोदन गर्ने प्रावधान छ । प्रतिपक्षी दलहरुले भने सरकारले अध्यादेश मार्फत निरंकुशता लाद्न खोजेको भन्दै आपत्ति जनाएका छन् ।