श्रावण १०, काठमाडौं । मधेसी जनअधिकार फोरम गणतान्त्रिकको बिस्तारित बैठक बुधबारदेखि सुरु हुदैछ । पर्साको वीरगञ्जमा बैठक शुरु हुने फोरम गणतान्त्रिकले जनाएको छ । पार्टी विभाजनपछिको यो पहिलो विस्तारित बैठक हो । बिस्तारित बैठकमा ३७ जना केन्द्रीय सदस्यसहित मधेशका १९ जिल्लाका ३ सय जना प्रतिनिधि सहभागी रहने फोरम गणतान्त्रिकका कार्यबाहक अध्यक्ष  एवं सूचना तथा सञ्चारमन्त्री राजकिशोर यादवले जानकारी दिनुभयो । बैठकमा राजनैतिक गतिरोधको निकास दिन पार्टीको भूमिका, पार्टी भित्रको विवाद समाधान, संगठन सुदृढीकरण र आगामी कार्यनीति एवं रणनीतिबारे छलफल हुने यादवले बताउनु भयो । उहाँका अनुसार बैठक ३ दिनसम्म चल्नेछ । फोरम गणतान्त्रिकका अर्का नेता नन्दन कुमार दत्तले आफूलाई कार्यबाहक अध्यक्ष भएको घोषणा गरेपछि फोरम गणतान्त्रिक टुक्रिएको थियो । पार्टीका केन्द्रीय अध्यक्ष जयप्रकाश प्रसाद गुप्ता भने भ्रष्टाचारको अभियोगमा हाल जेलमा छन् ।