२२ भाद्र, काठमाडौं । नेकपा माओवादीका सचिव नेत्रविक्रम चन्दले पार्टी एकताको विषयमा एकीकृत माओवादी अध्यक्ष पुष्पकमल दाहालसँग पटक–पटक कुराकानी भैरहेको खुलासा गर्नुभएको छ । एकीकृत माओवादीका अध्यक्ष दाहालले पनि नेकपा–माओवादीसँग पार्टी एकता संभव रहेको बताउँदै आईरहनुभएको छ । गत भदौ ९ गते आफनै निवास लाजिम्पाटमा नेकपा–माओवादीका पदाधिकारीसँग पनि प्रचण्डले निर्वाचनमा सहभागी हुने अवस्थामा सहकार्य गर्न सकिने संकेत गर्नुभएको थियो ।

राजधानीमा आयोजित एक कार्यक्रममा सचिब चन्दले आफूहरुको नेतृत्वमा एमाओवादीसँग पार्टी एकता हुन सक्ने बताउनुभयो । पहिला जन परिचालन गर्ने र त्यसपछि पनि परिवर्तन हुन नसके हतियार उठाउने स्पष्ट पार्दै त्यसपछिको क्रान्तिको नेतृत्व गरी आफू प्रधानमन्त्री बन्ने चन्दले दाबी गर्नुभयो । चन्दले आफूहरुको सहमति विना मुलुकमा निर्वाचन नै हुन नसक्ने ठोकुवा गर्दै आफूहरुसँग निर्वाचन असफल बनाउने धेरै रणनीतिहरु तयारी अवस्थामा रहेको बताए । जवरजस्ती चुनाव गर्न खोजे ध्वस्त पार्ने चेतावनी समेत दिनुभयो ।