राजधानीमा सम्पन्न साफ यु–१६ फुटबल च्याम्पियनसीपको उपाधि भारतले जितेको छ । त्रिपुरेश्वरस्थित दशरथ रंशगालामा आज सम्पन्न फाईनल खेलमा घरेलु टोली नेपाललाई १–० ले हराँउदै भारतले उपाधि जितेको हो । नेपाल भने भारतको जित सँगै उपविजेतामा चित्त बुझाउन बाध्य भएको छ । जितका लागि भारतका जेरी लालरेन्जुलाले १८ औं मिनेटमा गोल गरेका थिए । त्यसपछि नेपालले गोल फर्काउने केही मौका पाएपनि त्यसलाई सदुपयोग गर्न भने सकेन ।

यसअघि नेपालले बंगलादेशलाई पाँच एक ले हराउदै पहिलो पटक फाइनल यात्रा तय गरेको हो भने भारतले टाइब्रेकरमा अफगानिस्तानलाइ चार तीनले हराउदै नेपालसँगको भेट पक्का गरेको थियो । दुई वर्षअघि काठमाडौंमा नै भएको पहिलो संस्करणको फाइनलमा पाकिस्तानसँग हारेको भारतले त्यसको बदला यो पटक नेपालसँग लिएको हो । पहिलो संस्करणमा नेपाल भारतसँगै सेमिफाइनलमा पराजित भएको थियो । यस्तै नेपाल आर्मीको मैदान लगनखेलमा तेस्रो स्थानका लागि भएको खेलमा बंगलादेशले अफगानिस्तानलाई १–० ले हराएको छ ।

यसैबिच, उपाधीका लागि भएको भिडन्त खेलमा भारतसँग नेपाल पराजित भएपछि दर्शकले नाराबाजी गरेका छन् । दर्शकहरुले नाराबाजी गरेपछि प्रहरीले एक्कासी लाठी चार्ज गरेको छ । लाठी चार्ज गरेपछि त्यहाँ भागदौड समेत मच्चिएको थियो । एन्फाले भने प्रहरीलाई बल प्रयोग नगर्न आग्रह गरेको थियो ।