०५ श्रावण, काठमाडौं । एकीकृत नेकपा माओवादीका अध्यक्ष पुष्पकमल दहालको सांगठानिक प्रस्तावमाथि भएको समूहगत छलफलको अहिले निष्कर्ष प्रस्तुत हुँदैछ । शनिबार विहानदेखि भएको समूहगत छलफलको निष्कर्ष प्रस्तुतपछि बिस्तारित बैठकमा प्रस्तावमाथि धारणा राख्ने क्रम सुरु हुनेछ ।

ललितपुरस्थित खन्ना गार्मेन्टमा हिजोदेखि सुरु भएको बिस्तारित बैठकमा अध्यक्ष दाहालले ‘विशेष साङ्गठनिक तथा राजनीतिक प्रस्ताव’ पेस गर्नुभएको थियो । अध्यक्ष दाहालको सो प्रस्तावमा अध्यक्ष पद मात्रै राखेर सबै पदाधिकारीलाई केन्द्रीय समिति सदस्यका रूपमा राख्ने प्रस्ताव गरिएको बैठकका सहभागीले बताएका छन् । पद त्यागको घोषणा गरेका उपाध्यक्ष डा बाबुराम भट्टराईले वरिष्ठ नेतामा समेत रहन अस्वीकार गरेपछि पार्टीमा अध्यक्ष मात्रै राख्ने प्रस्ताव गर्न लागिएको हो ।

तत्कालका लागि सङ्क्रमणकालीन व्यवस्था गरेर पार्टीलाई संविधानसभाको निर्वाचनमा केन्द्रित गर्ने र सो निर्वाचनपछि राष्ट्रिय सम्मेलनको आयोजना गरेर साङ्गठनिक कार्यदिशा तय गरिने प्रस्तावमा उल्लेख छ । अध्यक्ष दाहालको प्रस्तावमाथि छलफल गर्नका लागि १६ वटा समूह निर्माण गरिएको थियो । ती समूहमा राज्य समूह, युवा परिचालन, सूचना तथा सञ्चार, अन्तर्राष्ट्रिय र केन्द्रीय कार्यालयको समूह, सल्लाहकार समिति र जनवर्गीय मोर्चाको समूह रहेका छन् ।

अध्यक्ष दाहालले प्रस्तुत गरेको सो प्रस्तावमा तत्कालका लागि पार्टीका पदाधिकारीहरू हटाई अध्यक्ष मात्रै राखेर सबै पदाधिकारीलाई केन्द्रीय समिति सदस्यका रूपमा राख्ने प्रस्ताव गरिएको बैठकमा सहभागी नेताहरूले बताएका छन् । असारको मध्यतीर बसेको एमाओवादीको केन्द्रिय कमिटि बैठकमा पदिय बिबाद उत्कर्षमा पुगेपछि बिस्तारित बैठक आह्वान गरिएको हो । बैठक भोली सम्म चल्ने एमाओबादलिे जनाएको छ ।