१३ चैत्र, काठमाडौं । एसीसी ट्वान्टी–२० क्रिकेट प्रतियोगितामा नेपालले विजयी सुरुवात गरेको छ । किर्तिपुरस्थित त्रिवि क्रिकेट मैदानमा मंगलबार भएको उदघाटन खेलमा तुलनात्मकरुपमा कमजोर माल्दिभ्सलाई ७६ रनले पराजित गर्दै नेपालले सुखद सुरुवात गरेको हो । टस हारेर पहिले ब्याटिङको निम्तो पाएको नेपालले दिएको १ सय ७२ रनको चुनौति पछ्याएको माल्दिभ्स निर्धारित ओभरमा ७ विकेट गुमाएर ९५ रनमै समेटियो । नेपालका लागि कप्तान पारस खड्काले २ तथा शक्ति गौचन, मञ्जित श्रेष्ठ, सञ्जम रेग्मी र वसन्त रेग्मीले समान १–१ विकेट लिए । यसअघि नेपालका लागि सूरुवाति ब्याटसम्यान प्रदिप ऐरीले सर्वाधिक ५९ रनको योगदान गरे ।

               यस्तै सरद भेष्वाकरले अविजित ३६ रन को योगदान दिए भने सुभास खकुरेलले २६ तथा बिनोद भण्डारीले १५ रनको पारि खेले । माल्दिभ्सका लागि मोहम्मद सफिले २ विकेट लिए भने अब्दुल्लाह सहिद र अमेद फैजले १–१ विकेट लिएका थिए । खेल हेर्न पहिलो पटक टिकटको व्यवस्था गरिएको भएपनि दर्शकको उल्लेख्य सहभागिता थियो । प्रतियोगिताको दोस्रो खेलमा नेपालले भोली हङकङसँग प्रतिश्पर्धा गर्नेछ भने आमामि शनिबार मलेसिया र आइतबार सिंगापुरको सामना गर्नेछ । यस्तै पुल्चोक मैदानमा आजै भएको खेलमा हङकङले मलेसियालाई ६ विकेटले पराजित गरेको छ । टस जितेर पहिले ब्याटिङको निम्तो पाएको मलेसियाले दिएको १ सय ४ रनको चुनौति हङकङले १२ ओभरमा ४ विकेटको क्षतिमा १ सय ८ रन बनाउँदै जित आत्मसात गरेको हो ।