२२ भाद्र, धादिङ ।बैद्य नेतृत्वको नेकपा माओवादीका सचिव देब गुरुङले क्रान्ति अझै बाँकि रहेकाले यसलाई सबैले सहयोग गर्नुपर्ने बताउनुभएको छ । आज रेडियो विहानीको कार्यक्रम जनचासोमा कुरा गर्दै गुरुङले प्रचण्ड र बाबुरामले विदेशी साम्राज्यबादसँग आत्मसमर्पण गरेकाले नेपालको माओवादीलाई अमेरीकाले आतङ्कबादबाट हटाएको आरोप लगाउनुभयो । उहाँले सहभागिको जिज्ञासामा नेकपा–माओवादीको अवको क्रान्ति अवश्य पनि सफल हुने बताउनुभएको छ । अहिले बार्ताको प्रक्रियाबाट निकास ननिक्लने भन्दै उहाँले आन्दोलनमा जानुको विकल्प नरहेको बताउनुभयो । कार्यक्रममा गोलमेच सम्मेलनलाई मुख्य जोड दिदै गुरुङले अहिलेको नेतृत्वले राजिनामा नदिएसम्म कुनैपनि समस्याको समाधान हुन नसक्ने उल्लेख गर्नुभएको थियो । शान्तिपूर्ण रुपमा सत्ता प्राप्त नभएमा हतियार उठाउने घोषणा गर्नु त सत्ताको मोह भएन र ? भन्ने प्रश्नको जवाफमा भने उहाँले आफुले त्यस्तो अभिव्यक्ति नदिएको भन्दै खण्डन गर्नुभयो ।